近日網上流傳一段海洋公園海豚Pinky撼頭埋牆片段，疑似自殘，其後園方解畫，指此舉乃Pinky自小的「慣常獨特動作」。姑勿論海豚是否因表演頻繁導致壓力爆煲，一時「諗埋一邊」，繼而「撼埋一邊」，每條海豚的確各有性格，有海洋公園海豚訓練員指，牠們不止有脾氣，而且蠱惑過陳浩南。

「佢哋每條都有唔同性格！」伍嘉慧說。她任職海豚訓練員六年，目前於海洋哺乳動物繁殖及研究中心工作，把裏面的10條海豚視如己出，包括疑似「睇唔開」的14歲海豚Pinky。

蠱惑恰新訓練員　忌偏心

她承認，照顧海豚的情緒大有學問，「佢哋同人一樣會發脾氣，我哋會喺佢哋發脾氣前先解決問題，假設佢哋三隻鍾意玩波，我哋唔會擺一個波落去，因為一定會搶」。此外，陌生海豚一旦入侵地盤，會影響同類情緒，果然有「人性」。

伍嘉慧英文名Angela，有隻海豚媽媽叫Angel，其子則叫Angelo，一家三口樂也融融，但絕不能因此偏心這對母子，「我哋唔可以偏心，因為佢哋感覺到，不過某幾隻會夾啲，因為合作耐啲，好似Angelo，今年兩歲，係我由細湊㗎」。說時一臉滿足，像跟記者介紹她的乖仔。

訓練員規定海豚跳躍高度，然而海豚智商甚高，Angela不諱言，牠們都是古惑仔，對這個高度「可加可減」，「當有新訓練員加入，海豚自己會降低標準，試探吓，例如跳得低少少，睇吓呢個訓練員好唔好恰」。

放洋英國　唔做OL寧執屎

Angela愛好水上活動，早已考獲潛水牌照，六年前於英國取得工商管理學位後回港當OL，但試問辦公室怎困得住飛魚，半年後加入海洋公園當上海豚訓練員，「第一次落水就係同Angel，突然有一刻恐懼，發覺佢大隻過你，高過你」。訓練員的職責還包括日常身體檢查，堂堂留英大學生竟然清理海豚糞便，「有人問我，大學畢業，點解要入嚟擦地？但既然照顧得佢哋，就連衞生都要照顧埋」。

去年暑假，園方因加開海洋劇場表演場次，遭外界痛斥勞役海豚，Angela坦言難受，「惟有努力話俾人知，我哋係好用心去照顧佢哋」。

她剛踏入女人30大限，但不心急結婚生子，更稱對着這10條「仔女」開心過照顧「人仔」，「人個腦好複雜，太多計算！但動物好簡單，鍾意就會喺你面前，唔鍾意就走」。

圖片:
http://hk.apple.nextmedia.com/news/art/20130530/18277426
蘋果日報 2013.05.30